CV a chur le chéile

1. Roinn do CV ina chodanna 

• Sonraí Pearsanta - níl aon ghá dáta breithe, inscne ná stádas pósta a lua!
• Ráiteas maidir le hAidhmeanna/Cuspóirí Gairme nó Próifíl Phearsanta – tá sé seo roghnach agus ní mór é a bheith dea-scríofa – ná cóipeáil ón idirlíon é – caithfidh sé léargas a thabhairt ort féin agus ar an méid atá uait.
• Oideachas & Cáilíochtaí – d’fhéadfá modúil, tionscadail agus aistí a bhaineann go sonrach leis an bpost a bhfuil iarratas á dhéanamh agat air a áireamh anseo.
• Fostaíocht – abair cén teideal a bhí ar do phost agus cén t-ainm a bhí ar d’fhostóir – dírigh ar ghníomhaíochtaí & ar thorthaí seachas ar liosta dualgais.
• Éachtaí (roghnach)
• Cur síos ar scileanna agus bíodh fianaise agat de gach scil a deir tú atá agat.
• Ábhair spéise/Gníomhaíochtaí eile/Ballraíocht.
• Moltóirí – iarr cead ar mholtóirí sula luann tú iad ar do CV. Go hiondúil bíonn moltóir acadúil amháin agus moltóir oibre amháin.

2. An ceann is deireanaí/is ábhartha ar dtús

• Tosaigh le do cháilíocht nó do thaithí oibre is deireanaí agus oibrigh do bhealach siar ansin.
• Ach, má tá taithí oibre ábhartha déanta agat ba chóir duit é seo a chur síos ar dtús (agus a lua sa litir chumhdaigh) agus ansin áit eile a bheith agat chun “taithí oibre eile” a lua.

3. Nod 3 – An Stíl Scríbhneoireachta

• Is cáipéisí gairmiúla iad seo agus ba chóir iad a scríobh go foirmiúil.
• Ná húsáid forainmneacha pearsanta e.g. ‘Mise’, “mé” ná ‘mo’.
• Bíodh an fhostaíocht a bhí agat roimhe seo san aimsir chaite agus do ról anois san aimsir láithreach – agus ní mór a bheith leanúnach.

4. Bíodh sé gonta

• 2 leathanach go hidéalach agus ná téigh thar 3 leathanach
• Ba chóir a bheith soiléir, soléite.
• Caitheann fostóirí súil sciobtha ar CVanna mar sin ná téigh i bhfad scéil leis.
• Ní féidir gach a rinne tú riamh a chur san áireamh mar sin teastóidh cúnamh uait an CV a ghiorrú má théann tú thar 3 leathanach.
• Bíodh sé gearr, gonta agus ábhartha – ná bíodh na hailt rófhada – níl am ag fostóirí scéal i mbarr bata a léamh – úsáid pointí le hurchair.

5. Bíodh slacht air

• Bíodh sé tarraingteach – ná bíodh an iomarca eolais ar an leathanach.
• Úsáid pointí le hurchair agus bíodh na habairtí gearr.
• Bíodh spás idir gach cuid.
• Bíodh an cló simplí agus gairmiúil – úsáid Times New Roman nó Ariel agus clómhéid 10 nó níos mó.
• Bíodh an chlómhéid chéanna do na ceannteidil ar fad agus don téacs ar fad.

6. Bí cruinn

• Ná bíodh aon bhotúin litrithe. Tá poncaíocht agus gramadach thar a bheith tábhachtach
• Ní bheidh aon suim ag fostóirí i CVanna lán le botúin shimplí is cuma cé chomh cumasach agus atá tú!
• Profáil agus seiceáil an litriú – ní leor seiceáil litrithe an ríomhaire – tá “cóir” agus “comhair” nó “saoi” agus “suí” litrithe i gceart ach níl an chiall chéanna leo. Ná glac leis an gcéad litriú a thugann seiceáil litrithe an ríomhaire duit, ní gá gurb é seo an focal atá uait!

7. Cuir in oiriúint

• Ba chóir gach CV a chur in oiriúint don phost a bhfuil iarratas á dhéanamh agat air. Tá sé seo an-tábhachtach agus is fiú go mór an tairbhe an trioblóid.
• Caithfidh fostóirí a fheiceáil go bhfeileann an duine don phost. Má luann tú na scileanna agus na modúil atá ábhartha don phost rachaidh sé seo i bhfeidhm ar an bhfostóir agus feicfidh sé an bhfuil tú feiliúnach don ról.
• Déan taighde ar an gcuideachta agus bain úsáid as sonraíocht an phoist go mbeidh a fhios agat cé na scileanna ba chóir duit aird a tharraingt orthu.
• Ní oibreoidh an CV céanna do gach post. Bíodh cúpla CV éagsúil agat don chineál post a bhféadfá iarratas a dhéanamh orthu e.g. d'fhéadfadh dhá CV a bheith ag céimí B Comm do ról mar chuntasóir faoi oiliúint agus do ról díolacháin.

8. Bí dearfach

• Faoin taithí oibre, úsáid focail cosúil le ‘forbairt’ ‘dearadh’ ‘bainistiú’ ‘comhordú’ chun béim a chur ar do chuid dualgas. Tá liosta focail “chumhachtacha” againn le cur ar do CV.
• Ná bíodh drogall ort scéal mór a dhéanamh den mhéid a bhain tú amach.
• Níl aon ghá sonraí a thabhairt de gach tasc a rinne tú. Dírigh ar an méid a bhain tú amach sa ról.

9. Bí ionraic

• Ní mar a chéile scéal mór a dhéanamh den taithí agus áibhéil nó scéal chailleach an uafáis a dhéanamh de!
• Beidh fíricí ó chuideachtaí!
• Beidh sé soiléir san agallamh má rinne tú áibhéil agus d’fhéadfá bheith thíos leis agus gan an post a fháil dá bharr.

10. Cuir beocht ann

• Tugann do chuid spéiseanna agus caitheamh aimsire léargas ort féin mar sin is maith an smaoineamh iad a chur san áireamh. Bíonn fonn ar dhaoine corrbhréag a insint sa chuid seo chun iad féin a dhéanamh níos tarraingtí ach seachain a ndéarfá go bhfuil caitheamh aimsire agat nach bhfuil agat – d'fhéadfaí teacht aniar aduaidh ort san agallamh!
• Má bhíonn do chuid post an-chosúil lena chéile déan cur síos ar na dualgais ar bhealaí difriúla chun nach mbeidh athrá ar bun agat
• Cuimhnigh cén léargas a thugann gach pointe ort féin – bíonn fostóirí ag lorg daoine spreagúla a bhfuil suim acu sa phost agus caithfidh do CV é sin a chur in iúl.
• Athraigh an leagan amach chun go seasfaidh do CV amach ach seachain dathanna ná grianghraif (mura n-iarrfar a leithéid).

Nuair a bheas an CV curtha le chéile agat – féach Seicliosta an CV agus más mac léinn in Ollscoil na Gaillimhe thú, féadfaidh tú coinne a dhéanamh le duine d’fhoireann an Ionaid le breathnú air (déan coinne trí Careers Connect).

^ Hide answer

Íoslódáil agus úsáid ár Seicliosta CV. Bíodh an oiread freagraí dearfacha agat agus is féidir sula dtabharfaidh tú do CV chuig an Ionad Forbartha Gairmeacha lena dtuairim a fháil.

^ Hide answer

Is í an litir chumhdaigh an chéad rud a léifidh an fostóir fút mar sin tá sí thar a bheith tábhachtach!

Na bunrialacha:

• Is leor leathanach amháin, 3 nó 4 alt. 
  
  
• Bíodh an litir leagtha amach i gceart. 
  Bíodh do sheoladh, seoladh iadsan agus an dáta san áit cheart. Seiceáil an litriú agus an ghramadach. 
  
  
• Cén leagan amach ba chóir a bheith uirthi?  – féach an chéad mhír eile. 
  
  
• Cuir in oiriúint don phost í. 
  Ná scríobh an litir chéanna do gach iarratas.  Ach an oiread leis an CV ní mór don litir chumhdaigh a léiriú an chaoi a sásaíonn tú critéir an phoist. 
  
  
• Bíodh ainm duine ar an litir.
  Más rud é go bhfuil tú ag fiosrú an bhfuil aon fholúntas, bíodh ainm duine luaite leis an litir seachas díreach "A chara nó a Dhuine Uasail". 
  
  
• Ní leor a rá cén tairbhe a bheas sa phost duitse! 
  Tá a fhios ag an bhfostóir go mbeadh sé iontach do do ghairm post a fháil leis an gcuideachta, gur taithí foghlama den scoth a bheadh ann duit, gur pléisiúr duit é etc. Ach caithfidh tú díriú ar an tairbhe a bheadh ann don chuideachta, an méid a bheas tú in ann freastal ar a riachtanais, na fadhbanna a bheadh tusa in ann a réiteach dóibh. 
  
  
• Bí cúramach leis an réim teanga. 
  Is litir chumhdaigh í seo agus ní litir aturnae. Ná bíodh sí rófhoirmiúil – bí gairmiúil ach ná bíodh drogall ort teanga chorraitheach a úsáid e.g.  "...táim paiseanta faoin réimse seo". Bíodh tú dearfach agus fuinniúil – bíodh fonn orthu casadh leat. 
  
  
• An mbeidh an litir chumhdaigh á seoladh ar ríomhphost agat? 
  Is minic a seoltar CV agus litir chumhdaigh ar ríomhphost anois. Féadfaidh an litir chumhdaigh a bheith i gcorp an ríomhphoist seachas mar cheangaltán – má sheolann tú ríomhphost bíodh aird agat ar an méid seo a leanas:
  • Bíodh aird agat ar rialacha gramadaí, poncaíocht, ceannlitreacha, agus struchtúr abairtí. Seachain giorrúcháin a bhíonn in úsáid i dteachtaireachtaí téacs nó ríomhphoist chuig cara mar shampla "ldt" nó "grma".
  • Bíodh an teanga soiléir agus soléite, ná húsáid béarlagair a bheadh agat i dtéacs chuig do chara. Níl sé feiliúnach agus ní thaitneoidh sé le fostóirí.
  • Scríobh d’uimhir ghutháin faoi d’ainm.
  • Bíodh uimhir thagartha an phoist (má tá ceann ann) nó teideal an phoist a bhfuil iarratas á dhéanamh agat air i líne an ábhair.
   

^ Hide answer

An Leagan Amach

^ Hide answer

Léigh an leagan ar líne den treoir maidir le CV a ullmhú ar issuu.com.‌

^ Hide answer